Putahe ang hanap ko,
Pero "Puta" ang nasabi ko
Nung malaman kong
Kinakain ng mga gagong politiko
Ang Ulam ng Masang Pilipino
Mga gahamang nakaupo,
Paulit-ulit niyo kaming ginagago.
Paulit-ulit niyo kaming ginagawang bobo.
Akala niyo ba hindi namin kayo nakikita?
Eh, Kayo ang may pinakamataas na silya dito sa mesa —
Mga puwet niyo’y nakatali’t nakadikit,
Nagpapanggap kayong nakapikit,
Walang mga malasakit.
Habang kami dito nag hihintay ng may
'Tingi- Tinging' mahulog sa lapag,
Kumakayod,
Nagkakapaltos,
Nagkakasakit,
Nagsasakripisyo,
Namamatay
Para lang sa isang itlog sa plato.
Isang itlog na lang sa plato,
Grabe, inubos niyo!
Sabay sabi,
Ang kapalit daw ay Gintong Itlog—
Sino ang niloko niyo?
Pati tubig sa aming tasa, ininom niyo.
Humanda kayo!
Dahil uhaw na uhaw na ang mga Pilipino
Sa Tunay na Pagbabago!
Kami-kami na lang dito sa lapag ang nagsasalo - salo
Ang nagkakarinigan ng kumukulong sikmura
Hindi na sasapat ang sipag at tiyaga
Para magkaroon ng nilaga
Sa mesa na paulit-ulit niyong ninanakawan!
Putahe ang kailangan namin,
Hindi ang ka-putahan niyo!
Kaya para sa kapwa ko Pilipino:
Dugo’t pawis man ang natitikman natin ngayon,
Lasapin natin
Tandaan natin yung lasa ng paghihirap
Alalahanin natin yung dami ng nawalan ng pag asa at di maka abot ng pangarap
Namnamin natin ang pagkadismaya sa mga taong nangakong di mawawalan ng pagkain sa lapag ng mesa
Hindi bansa ang kalaban natin
Kung di ang mga gahamang tao naghahain ng
Bulok na sistema!
Wag tayong mabilis makalimot
Lalo na sa taon na
Dalawang libo't dalawampu't walo.
Gawin na natin ang tamang pagboto.
Kilatising nang mabuti ang nagpapanggap sa Totoo;
Tumingin tayo sa may tunay na resibo,
Hindi sa kayang mag-abot ng isang libo nang patago.
Huwag na tayong magpaloko.
Tayo lang din ang gumugutom sa kapwa natin Pilipino.
Ngunit tayo rin
—tayo lang—
Ang makakapagluto at makakapaghain
Ng Pagbabago sa Mesa ng Bayan.
At para sa gahaman na politiko:
Mga gago!
Mga kampon ng Demonyo!
Hindi na pala ako gutom,
GALIT NA GALIT AKO!
Malason sana kayo sa POOT
ng Bawat Pilipinong ginagawa naman
ANG LAHAT
pero ginugutom niyo!
background music credit
May isa pa akong tula about adulting pressure, you can read & listen here ^^:
Kapag namulat huwag ka na pipikit
hoy tangina (sorry) ang ganda! sa sobrang mangha ko napatayo tuloy ako sa loob ng lrt, ayun inupuan ni ate yung upuan ko akala ata lalabas na ako 😭 pero ang galing!